喺剛過去嘅禮拜六，我哋邀請到 Jannus 教我哋自整散鞭（Vouched）。平時一條夠力夠硬淨嘅皮質散鞭大大話話都過五百，今次唔洗兩百我哋就製作到一條可以輕易留痕嘅橡膠散鞭。

正式開始之前，Jannus 特別提到佢嘅年輕歲月。喺佢當年未有裕錢買貴價玩具嗰陣，咩都要自己整，慢慢就咁累積咗一番心得。正所謂「貴有貴玩、平有平玩」。花啲心機同努力，創意妙思加上巧手製作，低成本都可以得到五星級享受。

日常生活中好多唔起眼嘅嘢，其實都可以變成 Play 中嘅道具。簡單如掃把棍，加上繩索就可以成為棒枷；除低一對絲襪又可以當成眼罩、口塞、或者手銬。甚至係平常人眼中嘅廢料，都可以成為我哋嘅寶貴玩具。今次工作坊所製作嘅散鞭主要材料係車軚同木棍，全部都係回收所得。重新賦予價值比廢料，除咗可以慳錢，仲可以保護我哋嘅地球，一舉兩得。大家平日都可以多留意身邊事物，話唔定會搵到新世界。

雖然材料取得容易，但製作都要花啲心思同時間。裁膠可以話係最難嘅一步，因為要將彎曲嘅車軚變成平整嘅畫布。之後仲要量度鞭尾嘅長闊同數量，再一條條剪出。每一條都係血與淚嘅成品。

剪好鞭尾之後就要釘上木柄，再鑽窿。上埋金屬環就可以加上裝飾同細節啦。雖然部分學員都係第一次使用電鑽同鐵槌，但大家都用得有板有眼，出嚟嘅成品都好靚啊。

整下整下都成三個鐘，雖然過程繁複，但都非常值得。花咗咁多心機親手製作，得到嘅滿足感真係無與倫比。

雖然原料都一樣，但大家都製作出獨一無二嘅設計。鞭尾、手柄、吊飾等細節都體現咗咁多位嘅創意。除咗散鞭之外，仲有學員將裁剩嘅邊角製作成龍尾鞭。唔好睇佢細細支，其實好邪惡㗎。

再次感謝 Jannus 為大家帶嚟一個咁難忘嘅周末，仲有咁多位學員嘅踴躍支持。希望疫情可以快啲過去，早日復辦大型聚會，同大家再次見面！

導師：Jannus

編輯：雲

#異色活動